Anggara, 16 Agustus 2022 inggih punika puncak perayaan Wanti Warsa SMK Negeri 5 Denpasar sane kaping-26 sane ngambil tema " Implementasi Merdeka Belajar dan Merdeka Mengajar’ SMK Negeri 5 Denpasar Siap Ciptakan Insan Cerdas, Kreatif, Inovatif, dan Berbudi Luhur " . Acara puniki dados galah sane pinih becik sane karasayang olih makasami warga SMK Negeri 5 Denpasar mawinan  kalaksanayang nemonin Wanti Warsa PROVINSI BALI sane kaping-64 miwah wanti warsa R1 sane kaping-77. Kepala SMK Negeri 5 Denpasar, I Made Buda Astika, S.Pd., M.Pd. ring sambrama wacanannyane maosang perayaan wanti warsa ring galahe puniki luih pisan mawinan kasobiahang Tari Kebesaran SMK Negeri 5 Denpasar sane kakardi olih Tim Program Keahlian Seni Pertunjukan. Sajabaning punika, kasobiahang taler para jayanti lomba, sane sampun kalaksanayang sadurungnyane. Lomba kalaksanayang sawetara aminggu sane makehnyane 39 lomba sane kasarengin olih makasami program keahlian sinarengan numbuhang rasa kebersamaan SMK Negeri 5 Denpasar.

Acara puncak peringatan HUT SMK Negeri 5 Denpasar karauhin olih Bapak Kepala Dinas Pendidikan Pemuda dan Olahraga Provinsi Bali miwah tamu undangan tiosan sane mawit saking DU/DI, instansi terkait, guru, staf pegawai miwah masyarakat.  Pinaka cihna rasa angayubagia ring acara punika kalaksanayang pemotongan tumpeng miwah sarana apresiasi majeng ring para jayanti lomba antuk panyukserahan pramana patra, sane kasukserahang olih Bapak Kepala Dinas Pendidikan Provinsi Bali kasarengin olih Bapak Kepala SMK Negeri 5 Denpasar.

Astungkara majalaran antuk acara puniki prasida nincapang sagilik saguluk miwah  ngraketang tali kekeluargaan SMK Negeri 5 DENPASAR…Jaya…Jaya..Jaya…!